Ollolai

S'operadore de s'isportellu linguìsticu de sardu dat sas dimissiones

2009-09-12T14:07:00.000+02:00

S'operadore de s'isportellu linguìsticu de sardu de Ollolai Sara Bussu dat sas dimissiones e faghet sos augùrios a chie at a intrare a nou.

S.B.

Cuncursu de poesia sarda “Imbìdia: Natura o cultura?”

2009-09-12T13:02:00.004+02:00

Su Comitadu chi organizat sa manifestatzione "Pastores Tenores" paris cun sa Comuna de Ollolai bandit su

Cuncursu de poesia sarda “Imbìdia: Natura o cultura?”

Sunt amìtidas a su cuncursu poesias iscritas in limba sarda in cale si siat forma mètrica subra de su tema “Imbìdia: Natura o cultura?” .
Si racumandat de rispetare su lìmite màssimu de 40 versos.
Sas poesias devent èssere inbiadas intro de su 27 de Cabudanni de su 2009 petzi a custu indiritzu de posta eletrònica: trad.popolari@tiscali.it.
Sas òperas ant a èssere letas in sa cunferèntzia “Imbìdia: Natura o cultura?” chi s’at a fàghere in Ollolai in s’àmbitu de sa manifestatzione “Pastores Tenores" 2009, dae su 2 a su 4 de Santugaine.
S’ant a dare tres primos prèmios ex aequo chi ant a èssere istèrgios de Iscraria e casu “fiore sardu”
Su regulamentu de su cuncursu s'agatat in su giassu:
http://formaparis.splinder.com/post/21260838/INVIDIA:+NATURA+O+CULTURA

S.B.

Ollolai: programma "Pastores Tenores" 2009

2009-09-11T20:25:00.010+02:00

CHENÀBURA, 2 DE SANTUGAINE 2009

A SAS 10.00
Pratza “Sa funtana Manna” (Regina Fontium)
Si presentat sa manifestatzione, s’aberint sas Cortes e s’acasàgiant sos espositores

A SAS 10.30
Realizatzione de unu Murale intituladu “Sa tràmuda”
Su Murale at a èssere fatu dae Giovanni Pilloni e Noemi Cadelano cun sos pitzinnos de s’iscola mèdia de Ollolai.

A SAS 11.00
Saledda Parrochiale
Projetziones de fotografias subra de su tema de su pastoralismu in Ollolai.

A SAS 16.00
Saledda Parrochiale
Presentada de sa tesi de làurea in giurisprudèntzia intitulada “Il matrimonio concordatario” iscrita in su 1936 dae Pòrtzulu Columbu, su primu laureadu de Ollolai.

A SAS 18.00
Saledda parrochiale
Projetzione de su documentàriu “L’ultimo pugno di terra” de Fiorenzo Serra.
Tzineteca sarda. Intervenint Gianni Olla, crìticu tzinematogràficu e autore de istùdios subra de su tzìnema de sos annos 60, e Pepeto Pilleri, operadore culturale de sa “Società Umanitaria”.

SÀBADU, 3 DE SANTUGAINE 2009

A SAS 9.00
Abertura de sas Cortes

A SAS 10.00
Saledda Parrochiale
Presentada de su libru: “Dai Lumière a Sonetàula (109 annos de pellìculas, documentàrios, inchiestas e contos televisivos subra de sa Sardigna)” de Gianni Olla, de sa sotziedade editoriale CUEC.
B’ant a èssere s’autore e sos editores.

A SAS 16.30
Saledda parrochiale
Cuncursu subra de su Fiore Sardu "Su menzus frore".
In custu cuncursu at a èssere isseberadu su mègius “fiore sardu” intre sos produtores chi adderint a su cunsòrtziu de tutela de su “fiore sardu”. In sa giuria b’ant a èssere produtores, cummertziantes e espertos de sas agentzias agrìculas regionales.

A SAS 18.00
Saledda parrochiale
Projetzione multimediale de “Umbras” de Dario Coletti espertu de fotografia documentària, de reportage e documentatzione de su territòriu
B’at a èssere s’autore.

DOMÌNIGA, 4 DE SANTUGAINE 2009

A SAS 9.00
Abertura de sas Cortes

A SAS 9.30
Saledda parrochiale
Premiatzione de sos binchidores de su cuncursu de poesia in limba sarda “Imbìdia: natura o cultura?”

A SAS 9.30
Saledda parrochiale
Cunferèntzia: Imbìdia: Natura o cultura?
Coòrdinat: Enzo Liborio Vacca (operadore culturale)
Intervenint : Alfredo Ancora (Psichiatria transculturale), Mariangelica Maoddi (Psicòloga transculturale), Fabio Ardau (Antropòlogu), Natalino Piras (Iscritore), Don Giuseppe Pani, Simonetta Frau (Neta de Zua Frau chi at iscritu duos libros subra de s’imbìdia in Ollolai).

A SAS 16.00
Saledda parrochiale
Dibàtidu: “Cale mùsica sarda. Cale tempus imbeniente?”. Coòrdinat Bustianu Pilosu de s’Assòtziu Tenores Sardigna

A SAS 18.00
Pratza “Sa funtana Manna” (Regina Fontium)
Contos cun cantu a tenore de “Il pastore errante” cun Gianluca Medas

Domìniga, su 4 de Santugaine dae sas 10.00 pro totu su mangianu e dae sas 17.00 pro totu su sero, sos tenores ant a cantare in sas pratzas e in sas Cortes de sa bidda.

Pro totu sas tres dies de sa manifestazione:
· Ant a èssere espostos e bèndidos sos libros de s’Editore Cuec, Sotziedade Universitària”.
· S’artista Sisinnia Soddu “Coga” at a mustrare sas òperas suas in sa saledda parrochiale.
· S’artista Francesco Mereu “Siesko” at a mustrare sas òperas suas in su Montricu, Carrera de La Marmora, 2

S.B.

Iscritas in sardu curretas

2009-09-11T12:03:00.002+02:00

Semus cuntentos chi in Ollolai apant curretu sos isbàllios in sos cartellones a s’intrada/essida de sa bidda!
S.B.

Iscritas in sardu isballiadas

2009-06-17T19:10:00.000+02:00

S’operadore de s’isportellu linguìsticu de sardu de Ollolai si dissòtziat dae sos cartellones chi ant ammaniadu pro su pàliu de sos molentes e finas dae cussos postos a s’intrada de sa bidda.
Difatis mancari chi apat dimandadu a su Presidente de sa Pro Loco ollolaesa de la consultare cando si devent iscrìere documentos pùblicos in sardu, su Presidente at fatu de conca sua.
“Vihinados” est una grafia improbàbile siat in LSC (ca diat èssere bighinados), siat in variante Ollolaesa (si diat dèvere iscrìere vi°inados, ca non b’est aspiratzione ma unu “colpo di glottide”).
In sos cartellones a s’intrada/essida de sa bidda bi sunt isbàllios non petzi in sardu ma finas in frantzesu e in tedescu, chi sunt istados singialados ma mai curretos.
S.B.

cunsignados sos atestados de partetzipatzione a su seminàriu de sardu

2009-05-15T15:20:00.003+02:00

Su 13 de maju 2009 su sìndigu de Ollolai Efisio Arbau at cunsignadu sos atestados de partetzipatzione a su seminàriu de sardu (LSC).
Sas letziones las at fatas s'operadore de s'isportellu linguìsticu de sardu de Ollolai, Sara Bussu, dae su 14 de ghennàrgiu a su 6 de maju de su 2009.
Sos frecuentantes ant imparadu sas normas ortogràficas de sa Limba Sarda Comuna (limba iscrita ufitziale de s’aministratzione pùblica de sa Regione Sarda).
S.B.

S'iscraria

2009-05-14T16:43:00.006+02:00

S’iscrariòngiu est un’atividade artigiana praticada in Ollolai e in àteras biddas de Sardigna dae s’època nuràgica (comente testimoniant unos cantos bronzetos e tzeràmicas).
Iscràriant petzi sas fèminas. Si sa gente bidiat carchi tziu iscrariende lu contaiant a ditzu e li poniant crobe. Fiat unu de sos traballos chi agiudaiat a trampare sa vida.

De iscraria si faghent istèrgios de impreu e de misuras diferentes: corbes, mesu-corbes, canisteddas, cherrigos, coghingiolas e iscatuleddos.

Pro iscrariare cheret a tirare s’iscraria chi sientificamente si narat “Asphodelus” e est una casta de erva arta chi naschit in logos solianos. Sas fògias de s’iscraria (irvutzu) sunt mannas, astrintas e illonghiadas a punta. Sa camba est arta unu metro o pagu prus e bogat frores biancos cun una riga iscura in mesu.

S’iscraria si tirat in martzu o in aprile cando est ispraende su frore, ca si nono est tropu modde. Cheret posta a assoliare pro deghe o vinti dies, cando nch’est pronta si carpit in duos de longu e si torrat a pònnere a assutare pro non si muforire. Tando si prendet a mannucros o mesu-mannucros chi s’arregollint in logos assutos. Manu a manu chi su mannucru servit, si ponet a modde duas o tres oras finas a ammoddigare (dae meda s’andaiat a su rivu e si poniat a modde aperdigadu pro lu fàghere abarrare in suta de s’abba). S’iscraria non devet èssere lassada tropu a modde ca si nono s’abbumbat. Tando si lassat pasare cugugiada in sas balletas, finas chi non est a mutta pro bogare sas “corrias” e sa “matza” (in ollolaesu “matha”): sa corria est sa corgiola e sa matza est su miduddu. Sas corrias e sa matza si prendent a mannucreddos ischirriende sas corrias craras pro fàghere s’istèrgiu prus fine, e sas prus iscuras pro fàghere s’istèrgiu prus grussu.

Pro comintzare a traballare s’infundent sas corrias e sa matza e s’imboligat sa corria a unu cantu de matza a manera de fàghere unu chircu: “su pipiolu”; pro sighire a traballare s’impreat su raju (unu puntzone de ossu de boe) chi si ponet a pùnghere sa tzerga (in ollolaesu therga) sa tzerga est un’inghìriu. S’inghìriu si faghet a puntu a puntu, punghende su raju in sa matza, bestende sa corria e imbolighende·la, e agiunghende matza cando nde bisongiat.Pro fàghere s’istèrgiu si traballat in antis su fundu e a pustis sa costa (sas tzergas podent èssere medas o de mancu segunde sa mannia de sa canistedda, de sa corve, de sa coghingiola e de su cherrigu), in s’urtima tzerga si faghet sa ria niedda o sos portellos. Dae meda cando s’istèrgiu fiat amaniadu si daiat a su viazante chi andaiat a lu vèndere in totu sa Sardigna in càmbiu de cosas chi non bi fiant in Ollolai: mescamente trastis pro sa domo, iscàmpulos de roba pro faghet vestes; camisas de trambicu, micadores, misuras de trigu o de òrgiu, usos e cannucras pintas pro filare sa lana, e a bortas puru dinare. Fiat un’economia misera ma agiudaiat a campare. A tempus de oje sos istèrgios de iscraria ant acuistadu prus valore, mescamente sos fines, difatis bolent postos a fàghere a cumandu e sunt bastante caros ca cherent traballu meda e sas fèminas chi iscrariant sunt semper prus pagas. Sunt impreados comente ornamentu in sa domo o postos in sos isposòngios pro cumbidare sos dùrighes.

S’iscrariòngiu est un’atividade artigianale apretzada a beru dae totu sos turistas chi benint a Ollolai.

Cuidadu dae sos istudentes de su seminàriu de sardu (LSC): Lucia Cadeddu, Maria Grazia Casula, Annalisa Columbu, Cosima Daga, Lorena Daga, Fellina Ladu, Giovanni Ladu, Viviana Petretto, Stefania Podda. Coordinamentu S.B.

Cuncursu de poesia sarda “Antoni Piludu”

2009-05-13T17:41:00.002+02:00

S’Amministratzione comunale de sa Comuna de Iscanu, paris cun s’Ufìtziu de sa Limba Sarda e cun sa Consulta pro sa Limba e sa Cultura Sarda, bandit sa de XVIII editziones de su

Cuncursu de poesia sarda “Antoni Piludu”

Sunt amìtidas a su cuncursu sas òperas iscritas in cale si siat variante de sa limba sarda.
Su cuncursu est articuladu in 3 setziones:
Setzione 1: Poesia in rima a tema lìberu;
Setzione 2: Poesia in versos lìberos a tema lìberu;
Setzione 3: Poesia o prosa pro sos pitzinnos de sas iscolas Elementares e Mèdias de Iscanu. Tema lìberu.
Si podet cuncùrrere a una setzione cun un’òpera ebia. Si racumandat de rispetare su lìmite de 40 versos. Est pretzisu de non nche colare sos 50.

Su Bandu integrale cun sas normas pro su cuncursu si podet dimandare a s'operadore de s'isportellu de limba sarda de sa Comuna de Ollolai.

S.B.

III CUNCURSU DE POESIA “PEPPINU MEREU”

2009-03-30T17:24:00.008+02:00

Su Sòtziu “Colletivu Peppinu Mereu” at organizadu su III Cuncursu de poesia Peppinu Mereu cun su contributu de s’Aministratzione Comunale de Tonara

Setzione A: poesia in rima o in versos liberos.
Setzione B: poesia in tonaresu, in rima o in versos liberos
Setzione C: poesia in rima o in versos liberos, pro giòvanos finas a 30 annos
Prèmios:

Setzione A: Primu € 400,00, Segundu € 300,00, Tertzu € 200,00
Setzione B: Primu € 250,00, Segundu € 150,00,
Setzione C: Primu € 200,00
Sas copias de sa poesia paris cun s’ischeda de partetzipatzione cherent mandadas a: Colletivu Peppinu Mereu Casella postale 12 - 08039 - Tonara, intro de su 30 de maju de su 2009.
Su regulamentu de su cuncursu s'agatat in su giassu:
http://nuke.peppinumereu.it/CUNCURSU2009SUBANDU/tabid/59/Default.aspx
S.B.

Avisu

2009-02-02T18:04:00.019+01:00

Mèrcuris su 13 de maju a sas 18:00 s'ant a cunsignare sos atestados de frecuèntzia de su seminàriu de sardu (LSC). S'avisat sos istudentes de atoviare a sa comuna.
S.B.

una borsa de istùdiu a sos universitàrios

2009-01-19T15:55:00.008+01:00

Sa Comuna de Ollolai agiudat sos universitàrios:
Pro s'annu 2009 est prevista una borsa de istùdiu de 1000 èuros pro cada istudente universitàriu residente in Ollolai.
Su mòdulu pro presentare sa dimanda est a disponimentu in sa comuna e devet èssere cunsignadu intre de su 31 de ghennàrgiu 2009.
A su mòdulu si devet agiùnghere:

còpia de su tzertificadu de iscritzione a s'Universidade,

còpia de su documentu de identidade,

còpia de su còditze fiscale.

Pro informatziones tel. Anna Guiso 0784 51051 e 0784 51052
S.B

Poesia

2009-01-15T15:16:00.000+01:00

De s'antiga barbàzia capitale
Fiat Ollolai pròspera e potente;
Oe, in cunfrontu, est torrada a niente
De sa gloria sua temporale

Bidda bella, sana e ospitale,
Meda laboriosa e divertente;
Cunservat premiadu e atraente
Su costùmene antigu orizinale.

Industria importante est s'iscraria
Chi traballat tot'annu sa femina,
Faghende ozetos de cada zenia.

Tenet una funtana cristallina
Frisca, bundantziosa e preferia
Chi de sas abas sardas est "regina".

(de: Francesco Sedda Coanu)

OLLOLAI

2009-01-15T15:07:00.000+01:00

Collocada a milli metros de altura
Coronada dae montes de granitu
Ti faghent umbra sos chercos de litu
Dande friscura in tempos de calura

Patria de su re mannu Ospitone
Vantas istòrias de grande tzitade
Ses rutta in miseria e in povertade
T’abbarrat petzi carchi bella cantzone

Famosa in sa Sardigna tot’intrea
Pro sa funtana bundante cristallina
Faghes ancora una vida meschina
Ma de ti salvare isperas so in bidea,

Su costùmene portant sas feminas
Ricu de trinas e camisas randadas
Finas dae Dante in tempus mentovadas
Lu portant cun orgòlliu in sas vetrinas

Campagnas birdes cun erba saporida
Chi ant pàschidu sas amas in passadu
Dende late pro casu profumadu
Onore e bantu a istagione finida.

Gherraiant a s’istrumpa in su coladu
Dae tempos antigos l’ant connotu
Faghende semper istrumpa gai e totu
Oe ancora non l’ant irmentigadu

Biazantes in totu sas contradas
Bendende corbes, canisteddas e cherrigos
Finas in Casteddu nche sunt finidos
Batende trigu pro pane e pro sebadas

Ma oe sa zente at dèpidu emigrare
Pro dare pane a sos fizos creschende
Cun s’isperàntzia de una vida detzente
Traballende onestamente e in dignidade

Ma totu custu lis faghet onore
Lu narant sos betzeddos in carrela
Ma de torrare ant a fagher manera
A sa bidda issoro mancari minore.

(De: Giovannino Ladu)

Avisu

2009-01-07T17:04:00.003+01:00

Sa prima letzione de su seminàriu de Limba Sarda Comuna s’at a fàghere mèrcuris, su 14 de ghennàrgiu dae sas 16:30 a sas 18:30 in su tzentru tzìvicu.
S.B.

Sa Comuna de Ollolai chircat unu ragionieri e un'ingenieri

2009-01-07T16:47:00.005+01:00

Cuncursu pùblicu, pro tìtulos e esàmenes pro unu postu de istrutore aministrativu contàbile - Ragionieri - Cat. C positzione econòmica C1, in sa Comuna de Ollolai.
Sas dimandas si devent presentare intre de su 12 de Ghennàrgiu 2009.

Cuncursu pùblicu, pro tìtulos e esàmenes pro unu postu de istrutore diretivu tècnicu - ingenieri - cat. D, positzione econòmica D1, in sa Comuna de Ollolai.
Sas dimandas si devent presentare intre de su 12 de Ghennàrgiu 2009.

(Fonte: "gazzetta n.97" de su 12/12/2008.)
S.B.

cursu de teatru in limba sarda

2008-10-29T17:42:00.001+01:00

Sa Comuna de Ollolai in collaboratzione cun s’isportellu linguìsticu de sardu

Organizat unu

-
CURSU DE TEATRU IN LIMBA SARDA
- -

Fatu dae unu regista teatrale espertu.

Chie est interessadu podet dare s’adesione in sa Comuna (ufìtziu de sa limba sarda) su lunis e su mèrculis dae sas 15:30 a sas 18:30, intro de su 1 de Nadale 2008.

S.B.

seminàriu de sardu LSC

2008-10-29T17:40:00.003+01:00

Sa Comuna de Ollolai in collaboraztione cun s’isportellu linguìsticu de sardu

Organizat unu

-
SEMINÀRIU DE LIMBA SARDA

-
pro imparare sas normas ortogràficas de sa Limba Sarda Comuna (limba iscrita ufitziale de s’aministratzione pùblica de sa Regione Sarda).
Sas letziones ant a èssere gratis et s’ant a fàghere una borta a sa chida (su mèrcuris dae sas 16:30 a sas 18:00) in su tzentru tzìvicu.
A sa fine de su cursu sa Comuna at a cunsinnare un atestadu de partecipatzione.

Chie est interessadu podet dare s’adesione in sa Comuna (ufìtziu de sa limba sarda) su lunis e su mèrcuris dae sas 15:30 a sas 18:30, intro de su 1 de Nadale 2008.

S.B.

agiudu a sas famìlias

2008-10-29T17:33:00.003+01:00

S'aministratzione de sa Comuna de Ollolai dat mille èuros a sas famìlias pro cada pilosu chi naschit.

S.B.

traditziones

2008-10-29T17:01:00.010+01:00

S'ISTRUMPA

S’istrumpa est una gherra antiga a beru chi tenet orìgines nuràgicas, comente testimoniant sos bronzetos de “sos gherradores”, chi si podent bìdere in su museu archeològicu de Casteddu. Oe, pro mèritu de sa federatzione ollolaesa chi organizat cada annu su campionau regionale, s’Istrumpa est reconnota a livellu natzionale dae su CONI, e a livellu internatzionale dae sa federatzione de sas gherras tzèlticas. Difatis atletas sardos, catalanos, bascos, brètones, iscotzesos e gallesos si sunt addoviados in Ollolai in su 2003 pro partetzipare a su Campionadu Europeu de gherras tzèlticas e de istrumpa.

SU COSTÙMENE

Su costùmene de Ollolai est unu de sos prus galanos de Sardigna: su prus bragosu est su de s’isposa, chi si collit sos pilos in su crundile pro pònnere su capiale e su tullu. Subra de sa camisa pramada si ponet sas palas e su tzipone, fronidu de vettas, granutillu e istrìllias. Suta su vardellinu a ghironeddos si bestint su coditu de tela e su coditu de listone, supra, imbetzes, su codale. Non mancant sas richìllias: sos gutones (de oro pro tancare sa gula de sa camisa e de prata pro tancare sos purtzos); sos coraddos e sos pindilizones, su puleu, s’iscapullàriu e s’ispuligadente.

S'ISCRARIA

Sas fèminas de Ollolai sunt àbiles iscrariadores: sas corbes e sas canisteddas de iscraria fiant bèndidas e apretzadas in totu sa Sardinna.

S.B.

Istòria de Ollolai

2008-10-29T16:28:00.006+01:00

Ollolai tenet orìgines antigas meda: su territòriu de sa bidda fiat abitadu dae su Neolìticu, comente mustrant sos iscavos de sa zona de Santu Basili, in ue est naschende unu parcu archeològicu de importu mannu. In Santu Basili e mescamente in su de "sa °onca frabi°a" (un amparu de 24m pro 4,50m, fraigadu in suta de duos montes), ant agatadu sete istratos diferentziados de repertos, cun bundàntzia manna de materiale tzeràmicu, chi documentat insediamentos dae su Neolìticu Mèdiu a s’Eneolìticu, finas a sos romanos.
Un’ipòtesi interessante narat chi Ollolai diat derivare dae Iolao, re de sos Iolaesos/Iliesos fuidos dae Troia cun Enea e naufragados in Sardinna. Paret chi s’ascusòrgiu de Iolao siat galu cuadu in su monte chi si narat pròpiu “s’As°isorzu".

Cunforme a sa traditzione Ollolai est istada a su tempus de s’imperadore Giustinianu, sa capitale de unu regnu barbaritzinu guvernadu dae Ospitone “dux Barbaricinorum” o “re pastore” (cumente lu cramant unos cantos istòricos), capu de sos sardos contra a sos invasores bizantinos. S’ischit pagu de custu re ma est documentada una lìtera chi l’at imbiadu papa Gregorio Magno in su 594 pro lu cumbìnchere a cunvertire sa gente sua a su Cristianèsimu.

Sa prima noa iscrita de Ollolai est in sa “Rationes Decimarum Italae Sardinia”, in ue sa bidda est numenada 5 bortas in s’elencu de sas biddas de sa diòtzesi de Santa Zusta chi bersaiant sas dètzimas a sa cùria de Roma in su sèculu XV. B’est finas in su “Codex Diplomàticus Sardiniae” in ue si nùmenat sa “Barbaria di Ollolà”. Custos iscritos cunfirmant sa traditzione istòricu-geogràfica chi inditat Ollolai comente capitale de sa Barbàgia omònima, e cumente una de sas curadorias de importu prus mannu de su Giuigadu de Arborea.
A pustis de sos giuigados, Ollolai intrat a fàghere parte de su Marchesadu de Aristanis.
A sa fine de su sèculu XV sa capitale antiga de sa barbàgia teniat 20.000 abitantes e fiat partzida in bighinados: s’amentant: “su Trighinzu”, “Moroniai”, “su Donnigheddu”, “Mirisone”, “Orroco°ina”, “su de Petzi” e Ollolai matessi.

S.B.

descritzione de Ollolai

2008-10-29T16:13:00.007+01:00

Capitale de sa barbàgia antiga omònima, Ollolai est una bidda de 1579 abitantes (tzensimentu de su 2001), posta a 960 metros de artària in su tzentru de sa Sardigna. Dae sa punta de s’Aschisòrgiu (1127m.), cando sa die est crara, si podet bìdere su mare siat a levante (sa costa de Orosei) siat a ponente (sa costa de Aristanis), est pro custu chi su monte si narat finas “sa bentana de sa Sardigna”.

Ollolai si presentat a su bisitadore imbèrghidu in una natura aspra e areste, inghiriadu dae chercos e èlighes seculares, lidones, mudegros, murtas, iscrarìa e armidda, in mesu de montes de granitu, in un’ambiente incontaminadu.

Est nota pro s’àghera bona e sas funtanas cristallinas, mescamente sa de Gupunnìo cramada dae La Marmora "Regina fontium" ca bogat un’aba frisca e bona a beru.

S.B.